E falando de concursos, podedes participar no II Concurso de Curtas na Rede, o certame da Dirección Xeral de Comunicación Audiovisual co que se busca fomentar a creación audiovisual a través de Internet.

Os participantes deberán realizar unha curtametraxe de xénero e técnica libre que non poderá exceder os 5 minutos, e deberá versar sobre as seguintes temáticas: xuventude, inmigración, medio ambiente ou visións alleas / visións nosas.

Para esta edición ábrese a categoría de micromovies. Nesta sección participarán filmes realizados coa cámara do teléfono móbil que non poderán exceder os 30 segundos e son de xénero e temática libre. Todas as persoas participantes terán a posibilidade de abrir unha bitácora referente ao seu filme e ás anécdotas da rodaxe.

Existentres categorías de competición, dependendo da idade do director e haberá catro premios por cada unha das categorías, de 1.500 euros. Tamén se recoñecerá a curtametraxe máis apoiada na Rede e a produción que máis e mellor promova a nosa cultura. Como ven sendo habitual neste tipo de concursos,o público poderá vota-las obras presentadas a través da web. E por se vos parece pouco, a TVG fará unha selección das curtas premiadas para emitir no seu programa Onda Curta.

Xa o sabedes. Así que... a que agardades?? Tedes ata o 15 de setembro.

http://www.curtasnarede.es