Festival de CANS 2007

O sábado 26 rematou o festival de Cans, o festival galego que se celebra nas mesmas datas que o de Cannes, pero con máis 'jlamur'. Nel podemos ver o que se vai cocendo dentro do noso panorama audiovisual, disfrutar coas mellores curtas nos distintos galpóns preparados para o evento, facer unha viaxe nun chimpibus - eses pequenos tractores que resultanun medio de transporte idóneo para o público do festival - ou disfrutar coas actuacións musicais de grupos galegos.

Este ano, por vez primeira, houbo ademais do clásico concurso de curtas, un concurso de videoclips musicais, no que se alzou co premio do xurado o grupo baionés Niño y Pistola, con Song 74; un videoclip realizado por Manolito Portolés, un dos membros do grupo.

Song 74

O premio do público ó mellor videoclip foi para Como cada día, de El Cubo, traballo incluído no seu disco Aurora

Como cada día

Sen chumbo, de Jorge Saavedra -a cal puidemos tamén ver no Culturgal deste ano-, proclamouse como a gran triunfadora da cuarta edición do Festival de Cans, xa que logrou tres premios do xurado: mellor curta de ficción, mellor actor (Xulio Abonjo) e mellor actriz (Cristina Castaño). Na categoría de anima-ción gañou Promesa, de Fernando Cortizo.

O premio de honra Pedigree '07 entregouse o venres 25 a Antón Reixa, o mesmo día das proxeccións de Só concertinas, o documental musical de Víctor Coyote que trata sobre este instrumento do norte de Portugal, e de Gritos en el pa-sillo, unha longametraxe de animación feita con cacahuetes (como esquecer a Juanjo Ramírez, o director da película, paseando por Cans co cacahuete protago-nista do filme). Pola noite, concertos de Víctor Coyote, Pablo Novoa e The Ellas, o grupo do actor Luis Tosar.

Gritos en el pasillo - Cannes 2007

Gritos en el pasillo - Trailer

O sábado Tristán Ulloa deu unha charla coloquio na Leira. A tarde foi amenizada por actuacións de The Turres Band e Toni Lomba & Elio dos Santos. Despois comezaron os visionados das curtas a concurso, así como as proxeccións do Jalpón Friki. Eu, como non tiña entrada, tívenme que conformar con estas, das que destacaría dúas -que se non lembro mal, tamén foron as que colleitaron máis aplausos na sesión a que fun-: Empanada de ameixa e Mariña Dor. Os Festicultores puxeron o punto final á festa coa súa actuación á noite no Torreiro de Cans.

Mariña Dor

Empanada de ameixa

O certo é que este ano era a primeira vez que ía ó festival de Cans, pero penso repetir a experiencia. Fíxome moita ilusión montar nun chimpibus e o tempo acompañou. Ademais de poder ver a un montón de caras famosas, como Antón Reixa, Luis Tosar, Tristán Ulloa, Roberto Vilar e Víctor Fábregas (Os Tonechos), Carlos Blanco, Manuel Manquiña, Víctor Mosqueira, Morris... e un sin fin máis.

Só me queda felicitar ós responsables do festival. As miñas noraboas para Alfonso Pato, o director do festival; a Xosé Holgado, que xunto a César Lourido coordinou aquelo para que saíra todo ben; á xente de produción, entre os que, entre outros, se atopaba Tamara Blanco, así como algúns alumnos do Ciclo Superior de Produción do IES Audiovisual de Vigo.... Moita xente que aportou o seu traballo e esforzo para que o festival fora, un ano máis, todo un éxito.

Posts relacionados: