E chegado o verán...

...chegan os festivais!! A pasada semana comezou en Vigo o festival de Jazz Imaxina Sons, un festival que naceu co obxectivo de dar cabida dentro da escena musical galega ó jazz europeo e que, como nas edicións anteriores, invade teatros, auditorios, locais da cidade e mesmo espazos na rúa para ofrecernos concertos de diferentes formacións de jazz.

Este ano poderemos ver entre outros a Orquestre Nacional de Jazz francesa, Carlos Bica & Trío Azul, Renaud García-Fons & Jean-Louis Matinier, D'jazz trio, The Missing Stompers, Jan Garbarek, John Surman Quartet, Chano Domínguez e a Imaxina Jazz Orchestra.

Pero este non será o único (nen o último). O Festival de Músicas Itinerantes Chan D'Arquiña, coñecido como Festichan, chega este ano a súa cuarta edición. Os días 6 e 7 de xullo poderemos bailar co hip-hop de Dios ke te Crew, vivir en directo o rock de Hollywood Sinners, ver en acción ós gañadores do concurso de maquetas Tanghana's Show, pasar un bo rato cos grupos Remendaos, Obrint Pas, La Troba Kung-Fu ou Sagarroi, así como a aplastante posta en escea do grupo Spunkfool.

Este festival debemos agradecerllo ó esforzo e ás gañas duns rapaces que tódolos anos loitan por sacar este festival adiante. Ademais dos concertos, haberá tamén distintas actividades, comoun roteiro de senderismo, onde se poderán coñecer as paisaxes que compoñen o entorno de Chan D’Arquiña; obradoiros de malabares e de percusión...

E o mellor de todo é que a entrada é de balde. Se non sabedes moi ben onde queda, na súa páxina web indícanvos como chegar ata alí.

Tan só 6 días despois e 50 km. máis lonxe temos o festival Cultura Quente, en Caldas de Reis. Os días 13 e 14 de xullo poderemos ver alí a grupos tan coñecidos do panorama nacional e internacional como Asian Dub Foundation, Kula Shaker, Sex Museum, Marky Ramone, Catpeople, Ectoplasma... Un montón de grupos interesantes que poderemos ver (tamén de balde) nesta localidade pontevedresa.