Tras unha longa tempada sen dar sinais de vida, volvo á carga. E que mellor que facer un repaso ao que se aveciña en breve polas nosas pantallas.

Entre as estreas cabe destacar a última película do director honkonés Wong Kar Wai, My Blueberry Nights, que conta no reparto con Norah Jones (no seu primeiro papel no cine), Jude Law, Rachel Weisz e Natalie Portman entre outros. É unha película na que segue coas súas historias de amores e desamores dende distintas ópticas posibles -algo ao que xa nos ten acostumado Wong Kar Wai-. Pero segundo din o feito de rodala nos EEUU fai que este film resulte máis próximo para nós que os seus anteriores (basta recordar 2046, fermoso film pero cun guión de difícil lectura e comprensión). Polo visto este conecta mellor co noso mundo occidental. Os diálogos entre os actores e o seu xeito de desenvolverse resultarán máis normais para os espectadores que os de Tony Leung en Desexando amar ou 2046.


O film amosa o viaxe espiritual dunha moza (Norah Jones) a través de América tratando de atopar o amor verdadeiro. Durante a viaxe, atopará a diversos personaxes enigmáticos, cuns anhelos maiores ós seus, que a axudarán na súa busca. Fermosos paisaxes da Nova York urbana e a lendaria Ruta 66 conformarán esta viaxe na que o personaxe principal levará a cabo unha exploración a través do seu interior. A estrea está prevista para Febreiro.

Outra estrea é o remake da película de John Carpenter Halloween (a cal tivo innumerables secuelas), dirixida na súa nova versión polo músico de rock Rob Zombie, que xa dirixira anteriormente A casa dos 1000 cadáveres e a súa secuela Os renegados do diaño, ademais de realizar un dos trailers ficticios que se emitiron entre o film de Quentin Tarantino Grind House e o de Robert Rodriguez Planet Terror nos EEUU. Como ocorre neste tipo de casos, a película terá os seus defensores e detractores, posto que as comparacións coa película de John Carpenter están garantidas. Haberá que esperar moi pouco para comezar a escoitar as opinións e críticas dos espectadores.


Outra película a destacar é This is England, do inglés Shane Meadows. Esta película de cine independente, ambientada nos anos 80, transcorre durante unhas vacacións escolares, nas que Shaun (un neno de 12 anos) que atopará un grupo deskinheadsaos que tomará como modelos e cos que entablará amizade, entrando a formar parte dese perigoso círculo. Nunha Inglaterra deprimida, cunha grande taxa de paro e co país en guerra con Arxentina polas Illas Malvinas (onde morre o pai de Shaun) desenvólvese este drama que nos adentrará neste grupo de xoves skinheads. Sen dúbida, este é un film para reflexionar e moi recomendable.

Tamén veremos moitas secuelas, como a 2ª parte de Alien vs. Predator (Alien vs. Predator: Requiem), Rambo IV, a cuarta entrega das aventuras de Indiana Jones (Indiana Jones e o reino da caveira de cristal), a segunda parte de Batman Begins (O cabaleiro escuro) e a nova entrega de As Crónicas de Narnia (Crónicas de Narnia: O Príncipe Caspian).

Chegará tamén as nosas pantallas (no mes de setembro) o musical Mamma Mia!, a versión cinematográfica domusical do mesmo título que ocupaba, non fai moito, a carteleira de Madrid. Mamma mia foi o primeiro dos musicais escritos a partir das cancións dunha banda pop. Estreado en Londres en 1999, converteuse no musical máis extendido por todo o mundo, con multitude de funcións en innumerables países.

O que dende logo si haberá son moitísimas adaptacións literarias, como Expiación - Máis alá da pasión (baseada na novela de Ian McEwan); El amor en los tiempos del cólera (adaptación da mundialmente famosa novela do premio Nobel García Márquez); Los crímenes de Oxford (baseada no libro Oxford Murders, de Guillermo Martinez), que está dirixida por Alex de la Iglesia; Into the Wild (Cara rutas salvaxes), baseada no bestseller de Jon Krakauer, sobre o mozo idealista Christopher McCandless que abandona a civilización e todas as súas posesións para poñer rumbo á Alaska; o documental A escafandra e a bolboreta, inspirado na novela do mesmo título de Jean Dominique Bauby (que escribiuna como consecuencia dun accidente que sufriu en 1995 e que o proxectou no universo do 'locked in syndrom' - pechado en sí mesmo-); Superdog (neste caso, a adaptación da serie clásica de debuxos animados Underdog); 30 días de escuridade, baseada na novela gráfica de Steve Niles e Ben Templesmith; Cometas no ceo, adaptación do best-seller de Khaled Hosseini; Pozos de ambición, dirixida por Paul Thomas Anderson e baseada na novela Petróleo (de Upton Sinclair); e Seda, de François Girard e baseada nesta novela de Alessandro Baricco.